ସୁବର୍ଣ୍ଣପୁର ଜିଲ୍ଲା ବିନିକାର ପ୍ରସିଦ୍ଧ ଦର୍ଶନୀୟ ପର୍ଯ୍ୟଟନ ସ୍ଥଳ ‘ ପାପକ୍ଷୟ ଘାଟ ‘
ସୁବର୍ଣ୍ଣପୁର ଜିଲ୍ଲା ବିନିକାରେ ଥିବା ପାପକ୍ଷୟ ଘାଟ ଯାହାକି ଅନେକ କିଛି ଇତିହାସ ବହନ କରେ । ପାପକ୍ଷୟ ଘାଟରେ ରହିଛି ଏକ ପୁରାତନ ବରଗଛ । ଘାଟରେ ସ୍ନାନ କରି ଏହି ବରଗଛ କୋରଡ଼ରେ ଗଳିଲେ ସବୁ ପାପକ୍ଷୟ ହୁଏ ବୋଲି ବିଶ୍ୱାସ ରହିଛି ।
ଓଡିଶା ପର୍ଯ୍ୟଟନ ସ୍ଥଳୀର ଗନ୍ତାଘର । ଓଡ଼ିଶାର ୩୦ଟି ଜିଲ୍ଲାରେ ଭିନ୍ନ ଭିନ୍ନ ଧାର୍ମିକ ସାଂସ୍କୃତିକ ଓ ପର୍ଯ୍ୟଟନ ସ୍ଥଳୀ ରହିଛି । ତେବେ ଓଡ଼ିଶାରେ ଏମିତି କିଛି ସ୍ଥାନ ଅଛି ଯାହାକି ଏବେବି ଲୋକ ଲୋଚନରୁ ଲୁକାୟିତ ଅବସ୍ଥାରେ ରହିଛି । ସେଥିମଧ୍ୟରୁ ସୁବର୍ଣ୍ଣପୁର ହେଉଛି ଏକ ଜିଲ୍ଲା । ଏହି ଜିଲ୍ଲାରେ ସୁବର୍ଣ୍ଣମେରୁ ମନ୍ଦିର, ହରିହରଜୋରା ଡ୍ୟାମ,ଭୀମଭୋଇ ସମାଧିପୀଠ ଆଦି ପାଇଁ ପ୍ରସିଦ୍ଧି ଲାଭ କରିଛି । କିନ୍ତୁ ଏହା ବ୍ୟତୀତ ସୁବର୍ଣ୍ଣପୁରରେ ଏମିତି କିଛି ସ୍ଥାନ ଅଛି ଯାହାକି ଆଜିବି ପର୍ଯ୍ୟଟକଙ୍କ ଆଖି ଆଢୁଆଳରେ ରହିଛି । ତେବେ ସେଠୀ ମଧ୍ୟରୁ ପାପକ୍ଷୟ ଘାଟ ହେଉଛି ଅନ୍ୟତମ । ଏହି ସ୍ଥାନଟି ଅନେକ କିଛି ଇତିହାସ ବହନ କରେ ।
ପାପକ୍ଷୟ ଘାଟରେ ରହିଛି ଏକ ପୁରାତନ ବରଗଛ । ଘାଟରେ ସ୍ନାନ କରି ଏହି ବରଗଛ କୋରଡ଼ରେ ଗଳିଲେ ସବୁ ପାପକ୍ଷୟ ହୁଏ ବୋଲି ବିଶ୍ୱାସ ରହିଛି । ତେଣୁ ବର୍ଷକ ବାର ମାସ ଏହି ଘାଟରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳେ । ପଶ୍ଚିମ ଓଡ଼ିଶା ସହ ପଶ୍ଚିମ ଛତିଶଗଡ଼ରୁ ମଧ୍ୟ ଅନେକ ଭକ୍ତ ଏଠାକୁ ଆସିଥା’ନ୍ତି । ଚନ୍ଦ୍ରଗ୍ରହଣ ଓ ସୂର୍ଯ୍ୟପରାଗ ସମୟରେ ଏଠାରେ ପ୍ରବଳ ଭିଡ଼ ଦେଖିବାକୁ ମିଳେ । ଚନ୍ଦ୍ରଗ୍ରହଣ ଓ ସୂର୍ଯ୍ୟପରାଗ ଦର୍ଶନ କରି ଘାଟରେ ସ୍ନାନ କରିବା ପରେ ବରଗଛ କୋରଡ଼ରେ ଗୋଟିଏ ପଟରୁ ପଶି ଅନ୍ୟ ପଟ ପାଖରେ ବାହାରିଲେ ପାପକ୍ଷୟ ହୁଏ ବୋଲି ଲୋକେ ବିଶ୍ୱାସ କରନ୍ତି । ତେଣୁ ଏହି ସମୟରେ ପ୍ରବଳ ଭିଡ଼ ହୋଇଥାଏ । ଚନ୍ଦ୍ରଗ୍ରହଣ ଓ ସୂର୍ଯ୍ୟପରାଗ ବେଳେ ଏଠାରେ ମେଳା ମଧ୍ୟ ପଡ଼ିଥାଏ। ସେହିପରି କାର୍ତ୍ତିକ ମାସରେ ମଧ୍ୟ ପାପକ୍ଷୟ ଘାଟକୁ ଭକ୍ତଙ୍କ ସୁଅ ଛୁଟିଥାଏ ।
ପାପକ୍ଷୟ ଘାଟ କେବଳ ଧାର୍ମିକ କେନ୍ଦ୍ର ପାଇଁ ପ୍ରସିଦ୍ଧି ଲାଭ କରିଛି, ତାହା ନୁହେଁ । ଏଠାକାର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଏହି ପବିତ୍ର ପୀଠକୁ ଟାଣି ଆଣେ । ପାପକ୍ଷୟ ଘାଟରେ ରାଧାକୃଷ୍ଣ ମନ୍ଦିର,କପିଳେଶ୍ୱର ଶିବ ମନ୍ଦିର, ପାର୍ବତୀ ମନ୍ଦିର ସହ ହନୁମାନ ମନ୍ଦିର ରହିଛି । ମହାନଦୀ କୂଳରେ ଥିବା ଏହି ପୀଠ ପ୍ରାକୃତିକ ସୌନ୍ଦର୍ଯ୍ୟରେ ଭରପୂର। ତେଣୁ ଏହା ଏକ ପିକ୍ନିକ୍ ସ୍ପଟ୍ ଭାବେ ଏ ଅଞ୍ଚଳରେ ପରିଚିତ। ଏପରିକି ମହାନଦୀ ଭିତରେ ଥିବା ବାଲିଚରରେ ମଧ୍ୟ ପିକ୍ନିକ୍ କରାଯାଏ । ତେଣୁ ବର୍ଷର ବିଭିନ୍ନ ସମୟରେ ପିକ୍ନିକ୍ କରିବାକୁ ଏଠାକୁ ଲୋକେ ଆସିଥା’ନ୍ତି। ବିଶେଷ କରି ଶୀତ ଋତୁରେ ପିକ୍ନିକ୍ ପାଇଁ ଏଠାରେ ଭିଡ଼ ଅଧିକ ହୁଏ।
ସୁବର୍ଣ୍ଣପୁର ଜିଲ୍ଲା ସଦର ମହକୁମା ସୋନପୁରରୁ ସଡ଼କପଥରେ ୩୨ କିଲୋମିଟର ଗଲେ ପଡ଼ିବ ବିନିକା । ସେହିପରି ବିନିକା ସହରରୁ ପାପକ୍ଷୟ ଘାଟର ଦୂରତା ମାତ୍ର ୩ କିମି । ପାପକ୍ଷୟ ଘାଟ ଯେ କେବଳ ଧାର୍ମିକ ସ୍ଥାନ ପାଇଁ ପ୍ରସିଦ୍ଧି ଲାଭ କରିଛି, ତାହା ନୁହେଁ । ଏଠାକାର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକମାନଙ୍କୁ ଏଠାକୁ ଟାଣି ଆଣେ । ତେବେ ଏହି ପାପକ୍ଷୟ ଘାଟ ଧାର୍ମିକ ପୀଠ ଭାବେ ଓଡ଼ିଶା ତଥା ଭାରତର ପର୍ଯ୍ୟଟନ ମାନଚିତ୍ରରେ ମଧ୍ୟ ସ୍ଥାନ ପାଇଛି ।
