ବରଗଡ ଜିଲ୍ଲା ପ୍ରସିଦ୍ଧ ଧର୍ମ ପୀଠ ନୃସିଂହନାଥ ମନ୍ଦିର

ବରଗଡ଼ ଜିଲ୍ଲା ଓଡିଶାକୁ ବିଶ୍ଵ ମାନଚିତ୍ରରେ ଏକ ସ୍ୱତନ୍ତ୍ର ସ୍ଥାନ ଦେଇଛି l ବରଗଡ଼ ଜିଲ୍ଲାରେ ଅନେକ ଐତିହାସିକ ସ୍ଥାନ ଏବଂ ସ୍ମାରକ ଅଛି, ଯାହା ଜିଲ୍ଲାର ଐତିହାସିକ ଘଟଣା ଗୁଡିକୁ କହିଥାଏ । ବରଗଡ଼ର ଅନ୍ୟତମ ପ୍ରାଣକେନ୍ଦ୍ର ଜିଲ୍ଲା ମୁଖ୍ୟାଳୟଠାରୁ ଦକ୍ଷିଣକୁ ୧୧୦ କି.ମି. ଦୂରରେ ଗନ୍ଧମାର୍ଦ୍ଦନ ପର୍ବତ ପାଦଦେଶରେ ଅବସ୍ଥିତ ପ୍ରଭୁ ଶ୍ରୀଶ୍ରୀ ନୃସିଂହନାଥ ମନ୍ଦିର ହେଉଛି ଏକ ପୌରାଣିକ ମନ୍ଦିର ଏବଂ ପଶ୍ଚିମ ଓଡିଶାର ଏକ ଅଦ୍ୱିତୀୟ ପର୍ଯ୍ୟଟନ କ୍ଷେତ୍ର ।

ଏହି ମନ୍ଦିର ତ୍ରୟୋଦଶ ଶତାବ୍ଦୀରେ ନିର୍ମିତ ବୈଷ୍ଣବ ମନ୍ଦିର ଯେଉଁଠାରେ ଭଗବାନ ନୃସିଂହ ବିରାଡ଼ି ବା ମାର୍ଜାର ରୂପେ ପୁଜା ପାଉଛନ୍ତି l ଏଠାରେ ଭଗବାନ ନୃସିଂହ ବିରାଡିର ମସ୍ତକ ଏବଂ ସିଂହର ଶରୀର ଧାରଣକରି ପୂଜା ପାଇ ଆସୁଛନ୍ତି । ନୃସିଂହନାଥ ମନ୍ଦିର ଏକ ପ୍ରସିଦ୍ଧ ଧର୍ମ ପୀଠ ଯାହା ଅତୀତର ବୋରାସମ୍ବାର ସାମ୍ରାଜ୍ୟ ସହ ସମ୍ବନ୍ଧିତ ।  ୩୨୩୪ ଫୁଟ ଉଚ୍ଚତା ବିଶିଷ୍ଟ ଗନ୍ଧମାର୍ଦ୍ଧନ ପର୍ବତର ପାଦ ଦେଶରେ ଏହି ନୃସିଂହନାଥ ମନ୍ଦିର ଅବସ୍ଥିତ ।

ମନ୍ଦିରର ଆଖପାଖରେ ଏକ ପାହାଡି ଝରଣା ପ୍ରବାହିତ ଯାହା ଭିନ୍ନ ଭିନ୍ନ ସ୍ଥାନରେ କପିଳଧାରା, ଭୀମଧର, ଚଳଧର, ସୀତାକୁଣ୍ଡ, ଗୌକୁଣ୍ଡ ଆଦି ଭିନ୍ନ ଭିନ୍ନ ନାମରେ ଜଣା ।  ଗନ୍ଧମାର୍ଦ୍ଧନର ସର୍ବୋଚ୍ଚ ଶିଖର ବିନ୍ଦୁ ‘ଭୀମ ମଡୁଆ’ ନାମରେ ଜଣା ।  ପବିତ୍ର ବୈଶାଖମେଳା ନୃସିଂହନାଥ ମନ୍ଦିରରେ ନୃସିଂହଚତୁର୍ଦ୍ଦଶୀରେ ପାଳନ କରାଯାଏ ଓ ପ୍ରିତି ବର୍ଷ ନୃସିଂହଚତୁର୍ଦ୍ଦଶୀରେ ଏକ ବିଶାଳ ମେଳାର ଆୟୋଜନ ମଧ୍ୟ କରାଯାଏ ଯାହା ହଜାର ହଜାର ଭକ୍ତଙ୍କୁ ଆକର୍ଷିତ କରିଥାଏ ।  ଏହା ବ୍ୟତୀତ ସୌର ପରାଗ ଓ ଚନ୍ଦ୍ର ଗ୍ରହଣ ଦିନ ମଧ୍ୟ ଏହି ପୀଠରେ ପର୍ବ ପାଳନ କରାଯାଏ ।

ମନ୍ଦିର ସମ୍ମୁଖରେ ଝରଣା ଆରପଟେ ରହିଛି ଗରୁଡ଼ ସ୍ତମ୍ଭ ଯାହାର ଶୀର୍ଷରେ ଦୀପାବଳି ଉପଲକ୍ଷେ ଦୀପ ପ୍ରଜ୍ଜ୍ୱଳନ କରାଯାଇଥାଏ l ଶ୍ରୀଶ୍ରୀ ନୃସିଂହନାଥ ପୀଠ କେବଳ ସୌନ୍ଦର୍ଯ୍ୟ ଓ ଧାର୍ମିକ ଦୃଷ୍ଟିରୁ ନୁହେଁ, ମନ୍ଦିର ନିର୍ମାଣ କଳା ଓ ପ୍ରସ୍ତର ଖୋଦିତ ସୁକ୍ଷ୍ମ କାରୁକାର୍ୟ୍ଯ ଯୋଗୁଁ ମଧ୍ୟ ସ୍ୱତନ୍ତ୍ର ମହତ୍ୱ ପ୍ରତିପାଦିତ କରେ l ଏଠାକାର ପରମ୍ପରା ଅନୁସାରେ, ଏଠାରେ କେବଳ ୨୨ ବର୍ଷରୁ କମ ବୟସର ପୂଜକ ହିଁ ଠାକୁରଙ୍କ ପୂଜା କରନ୍ତି ଓ ତାଙ୍କୁ ୨୨ ବର୍ଷ ହୋଇଗଲେ ଅଯୋଗ୍ୟ ଘୋଷଣା କରାଯାଏ l ନୃସିଂହନାଥ ମନ୍ଦିରର ପାଦ ଦେଶରେ ପବିତ୍ର ପାପନାଶିନୀ ନିର୍ଝରିଣୀ ପ୍ରାକୃତିକ ସୌନ୍ଦର୍ଯ୍ୟର ପ୍ରତୀକ ଅଟେ, ଏହା ସମସ୍ତ ପର୍ଯ୍ୟଟକଙ୍କୁ ସମ୍ମୋହିତ କରିଥାଏ l ବିଶ୍ୱାସ କରାଯାଏ ଯେ ପାପନାଶିନୀ ଝରଣା ନିକଟରେ ଦୁଃଖର ଉପଶମ ପାଇଁ ଏକ କମନୀୟ ଖୋଦନ ଚିତ୍ର ସଂରକ୍ଷିତ ହୋଇ ରହିଛି ଯାହାର ଦର୍ଶନ କଲେ ମାନବ ଯାବତୀୟ ପାର୍ଥିବ ଯନ୍ତ୍ରଣାରୁ ମୁକ୍ତିଲାଭ କରିଥାଏ l